Kiwifuglar á Suðureyju

Waterpolo

2010-03-13T16:12:00.003+13:00

Heiðar er byrjaður að æfa Waterpolo - sundknattleik. Spilar með skólaliðinu á hverjum miðvikudegi. Æfingarnar eru fyrir skóla þe. kl 07 á morgnana. Hann er duglegur kappinn.

Nýr fjölskyldu meðlimur

2010-03-13T15:49:00.004+13:00

Nú hefur nýr fjölskyldu meðlimur litið dagsins ljós. Hann kom í heiminn 27 febrúar, vóg 4335 gr og var 53 cm langur. Hann hefur fengið nafnið Matthías Ingi. Matthías Ingi er mjög duglegur að drekka og vaka á nóttunni. Foreldrum sínum til mikillar gleði. Það er að hann drekkur vel. Stefán Magnús skilur ekkert í því að hausinn á foreldrum hans hangir alltaf til hliðar þegar þau setjast niður :)

Til vina og vandamanna

2010-03-03T19:49:00.002+13:00

Jæja vinir og vandamenn. Við erum að endurvirkja bloggsíðuna okkar. Við lofum ekki neinum stórum færslum en munum reyna okkar besta :)

Er ekki tími til kominn að...........

2008-10-19T10:59:00.005+13:00

Við erum lifandi! Allt gott af okkur að frétta. Bergur er að ljúka veru sinni á gjörgæslunni og mun fara aftur á bráðamóttökuna. Svo er hann á fullu í sjúkrafluginu þess á milli. Já, bara sáttur við sitt. Það er Heiðar líka þrátt fyrir að honum fyndist foreldrar sínir reyna að eyðileggja fyrir honum skólafríið með því að takmarka þann tíma sem hann mátti eyða í tölvunni og horfa á sjónvarp. Nú er skólinn byjaður aftur og er hann bara ánægður með það, svona eins og unglingi einum er lagið :) Stefán Magnús er byrjaður að mæta á leikskólann. Finnst gaman að mæta þegar mamma eða pabbi eru með honum en svo þegar þau ætla að fara þá líst honum ekki eins vel á hann. Hann er nú farinn að venjast betur grætur bara í 10 mín þangað til hann fær kex og sitja rólunni. Þá er hann ánægður, dinglar þarna og maular kexbitann sinn. Ég er farin að "vinna", eða í þjálfunarprógramið á Princess Margaret Hospital. Það er einkarekin röntgendeild, svona hálf stafræn eins og það sem ég starfaði við heima nema annað myndvinnslukerfi. Kom sjálfri mér þægilega á óvart hvað ég man hvernig á að gera hlutina. En þetta kemur allt hægt og rólega. Fyndið hvað hver deild hefur sinn sið :) Reyndar er einn siður sem við ættum að taka upp í Fossvoginum, á föstudögum eftir vinnu setjast allir inn á kaffistofu með kælt hvítvín og bjór, svo er spjallað um daginn og veginn :) Eftir 3 mánaða þjálfun þá tek ég próf þannig að í janúar ætti ég að verða fullgildur geislafræðingur á NZ.

Ísland

2008-06-16T23:10:00.003+12:00

Loksins erum við tilbúin að leggja af stað, allir orðnir spenntir að hitta ykkur. Sjáumst hress.

Haustlitaferð

2008-05-24T20:20:00.003+12:00

Um daginn var farið í haustlitaferð. Stefnan tekin á Hanging Rock Bridge sem var merkt inn á kort sem áhugaverður staður. Jú jú þetta var falleg lítil á en brúin var nú bara venjuleg steinbrú og í fjarska sá maður lítill klett. Skrítið að merkja þetta inn á kort. Við gerðum gott út hlutunum keyrðum niður að ánni, fengum okkur nesti og áttum bara notalega fjölskyldustund. Þetta var reyndar fyrsta lautarferð Stefáns Magnúsar, hann er enn í stífri ferðaþjálfun hjá pabba sínum :)

Hoppa, hoppa, hoppa!

2008-05-01T22:39:00.001+12:00

Stefán Magnús fékk hoppurólu í dag með tónlistarmottu. Tónlistarmottan er með 3 mismunandi stillingar, dýrahljóðum, danstónlist og "silly sounds" Hann fékk smá hjálp hjá bróður sínum hvernig ætti að hoppa. Ekki það að hann þyrfti hana hann var svo snöggur að átta sig á hoppinu. En tónlistarmottan truflaði aðeins því hann horfði meira á myndirnar á henni heldur en að hoppa :) Heiðar Örn var í svona hoppurólu þegar hann var lítill og fannst það mjög gaman. Gaman frá því að segja að þegar Bergur var að setja upp róluna með Stefáni Magnúsi í, byrjaði hann að skamma Heiðar fyrir að toga svona í róluna. Heiðar og ég veltumst um af hlátri því Heiðar kom ekki við róluna né Stefán Magnús. Bergur áttaði sig bara ekki á því hvað stráksi var orðinn þungur :)

Loksins!

2008-04-19T15:29:00.004+12:00

Loksins smá blogg frá okkur :) Er ekki til íslenskt máltæki : Engar fréttir, góðar fréttir!

Við höfum það gott hérna í Kiwilandi. Heiðar er kominn í Burnside High School, byrjaði ár 9 núna í febrúar. Skólinn er frá ári 9 til 13. 13 er útskriftarárið og eru krakkarnir að verða 18 ára þegar þau útskrifast. Honum gengur vel í skólanum. Byrjaði að læra þýsku í vetur og líkar það vel. Það er gaman hvað hefur orðið mikil breyting á honum í sambandi við lærdóminn. Hann er svo metnaðarfullur með heimalærdóminn og þau próf sem hann tekur. Svo er hann í "Chorus" í uppfæslu skólans á söngleiknum Grease. Fer á söng og dansæfingar reglulega. Fyrir 2 vikum byrjaði hann í tónlistarskóla "Christchurch Music Center" þar sem hann lærir á franskt horn eins og hann Jói afi heitinn spilaði á. Kennarinn Mr Antonius er mjög ánægður með hann, ég sat í tíma hjá honum í gær og hlustaði á Heiðar spila. Þá sagði Mr Antonius: "Heidar you are a natural French Horn player!" Getur maður fengið betra hrós :)

Stefán Magnús bætir við sig á hverjum degi. Hann hefur uppgötvað hendurnar sínar og er farinn að hafa góða stjórn á þeim. Tekur hluti og stingur þeim upp í sig, allt á að fara upp í munninn. Í morgun greip hann í fyrsta skipti í tærnar á sér og var að reyna að stinga þeim upp í sig. Það heyrðist rym og miklar stunur við þessar æfingar, litli bollu bumban var heldur betur fyrir. Svo er ekkert skemmtilegra en að standa í fæturnar. Heiðar segir að hann læri að standa og ganga örugglega áður en hann lærir að sitja og skríða. Stefán Magnús er mjög hrifinn af bróður sínum. Þegar Heiðar kemur heim á daginn úr skólanum baðar hann út handleggjunum og veifar höndunum og er eitt sólskins bros í framan. Heiðari finnst nú ekkert leiðinlegt að hafa einn sem sýnir honum óskipta athygli og finnst öll fíflalætin sem hann framkvæmir skemmtileg :)

Bergur vinnur núna í "Beina búðinni" eins og Heiðar kallar það. Bone Shop er það kallað á ensku, hann vinnur þarna í 3 mánuði, þetta er partur af sérnámsprógramminu hans.

Við fjárfestum í flugmiðum heim til Íslands í fyrradag. Áætlað er að koma heim um miðjann júní og vera í mánuð. Reyndar getur Bergur aðeins verið í 2 vikur. Við hlökkum mikið til. Vonum að sjá sem flesta heima!

Stefán Magnús Bergsson

2008-02-03T22:23:00.000+13:00

Sá litli er orðinn 1 mánaða og hefur fengið nafnið Stefán Magnús. Hann dafnar vel, þyngist og lengist eins og hann á að gera. Fylgir vel sinni vaxtarkúrfu segir Molly ljósmóðir. Á lengdina passar hann akkúrat frá lófa til olnbogabótar á pabba sínum. Hann er farinn að brosa, myndast við að hjala og bregður sjálfum sér þegar það kemur óvart hjal :) Honum finnst mjög gaman að vaka hvenær sem er sólahringsins, þá finnst honum tími vera til að við spjöllum og syngjum :) Okkur finnst hann bæta við sig með hverjum deginum.

Sætir bræður kúra saman.

2008-01-24T23:43:00.000+13:00

Hjólaferð og fyrsta bílferðin

2008-01-24T23:27:00.000+13:00

Um daginn fórum við í smá ferðalag um Banks Penninsula, sem er hérna rétt fyrir utan Christchurch. Veðrið var mjög gott en svolítill hlýr vindur. Við tókum hjólið hans Heiðars með og hann hjólaði 3 leggi af ferðinni. Við sem sagt keyrðum upp skörðin og hann hjólaði niður :) Svakalega skemmtilegt. Þetta var fyrsta bílferðalag litla og fannst honum það bara ágætt. Best fannst honum að vera á ferðinni, þá svaf hann vært en þegar við þurftum að stoppa galopnaði hann augun og kvartaði. Malarvegir voru greinilega í uppáhald. Upprennandi ferðakarl :)

Nýr Kiwifugl :)

2008-01-03T21:00:00.000+13:00

Jæja, þá er litli Kiwifuglinn okkar kominn í heiminn. Hann fæddist 28 des, var um 18 merkur og 54 cm. Aldeilis stór, lítill strákur :) Okkur líður báðum vel, hann drekkur vel og dafnar. Stóri bróðir er mjög góður við hann og hjálpar til með litla. Þó er hann ekki alveg tilbúinn í bleyjuskiptin :) Bergur er í feðraorlofi og Heiðar í sumarfríi svo við erum öll 4 heima sem er frábært, gefur okkur tækifæri að kynnast nýjasta fjölskyldumeðlimnum í ró og næði.

Linkur á myndasíðuna er hérna til hliðar.

Útskrift Heiðars frá Cobham Intermediate

2007-12-18T23:53:00.000+13:00

Jæja nú er strákurinn "officially" orðinn unglingur, útskrifaður úr barna/gagnfræðaskóla og er á leiðinni í gagnfræða/menntaskóla. Útskriftin frá Cobham var í kvöld, 2 1/2 klst af söng, verðlaunaafhendingum og ræðum. Það voru 350 nemendur og foreldrar þeirra sem sátu undir herlegheitunum og leið tíminn alveg ótrúlega hratt. Ekki fannst okkur leiðnlegt þegar Heiðar var kallaður upp á svið og honum veitt viðurkenning fyrir "All round academic and social progress". Við Bergur vorum að rifna úr stolti yfir stráknum okkar.

Thomas og Heiðar, vinirnir kátir að vera komnir í sumarfrí.

Nýtt sport - Bodyboarding

2007-11-23T11:38:00.000+13:00

Þeir feðgar hafa uppgötvað nýtt skemmtilegt sport, Bodyboarding. Nú er pakkaði í picknick og farið á ströndina. Þeir hamast í sjónum, sem er enþá frekar kaldur en alvöru víkingar láta nú ekki þannig smámuni á sig fá :) Við bumbubúinn tökum myndir, sitjum á ströndinni og sólum okkur. Hérna eru myndir sem voru teknar í síðustu ferð.

Flutningar

2007-11-23T11:19:00.000+13:00

Nú höfum við verið í nýja húsnæðinu í meira en mánuð. Ætli sé nú ekki kominn tími á myndir af því :) Það er ekki margt sem við söknum frá hinu húsinu, nema Mjási. Núna búum við í botlangagötu sem er mjög hljóðlát. Þó við erum nær flugvellinum þá heyrum við varla í honum. Nú er hægt að sitja á veröndinni og talað saman í venjulegum málróm án þess að þurfa að öskra yfir umferðaniðinn :)

Góður árangur

2007-11-18T15:52:00.000+13:00

Heiðar fór í gráðun í karateklúbbnum sínum um daginn. Þar fékk hann staðfest bláa beltið og mikið hrós fyrir góða gráðun. Frábært að sjá framfarirnar hjá honum.

Þorrablót

2007-11-13T21:46:00.000+13:00

Frábært þorrablót var haldið heima hjá Mikka um daginn. Þar mættu flest allir íslendingar í Christchurch og nokkrir Kiwiar allir klæddir sem víkingar sem var þemakvöldsins. Á boðstólnum var fullt af heimatilbúnum þorramat ss. Súrsuðum hrútspungum, sviðakjömmum, flatbrauði, skötu, rófustöppu, pönnukökum, kleinum og fleiru góðgæti að íslenskum sið. Svo má nú ekki gleyma að flest okkar áttu brennivínslögg sem við komum með. Hangikjötið var líka á borðum, reyndar kiwi sauðahangikjöt sem er ekki slæmt á bragðið. Allt þetta góðgæti rann vel niður með jólaöli sem hefur verið hefur verið í smökkun nokkur jól og fundist hefur álíka blanda og gerð er heima, dökkur Guinness og Budget appelsín, hæfilega blandað :) Þetta var reglulega vel heppnað kvöld, mikið borðað og sungið að íslenskum sið.

Heiðar bloggar!

2007-09-29T22:21:00.002+12:00

Hey hey! Hér er ég að blogga úr skóla fríinu mínu............ já ég er í skólafríi og það er svo :):-) nema byrjunin á því viljið þið vita af hverju? Ok, ég skal segja ykkur það ég var veikur í heila viku :( En förum frá því, Mjási/kisi/feiti kisi hefur verið hjá okkur og um daginn var hann eins og dyravörður af því að hann var rosalegur rápari. Á föstudaginn fór ég með vini mínum Thomasi Hughes út í tennis og þann sama dag lærði ég hvernig ætti að bæta dekkið á hjólinu mínu til að getað hjólað út á tennisvöll. Á föstudagskvöldum þá bökum við pizzu og í þetta skiptið ákvað Bergur pabbi að grilla sína í staðin að setja hana í ofninn. Hún heppnaðist bara furðu vel hjá honum. Bið að heilsa ykkur öllum, Kveðja Heiðar Örn.

p.s. Litli segir allt gott og sparkar vel í kisa þegar að hann liggur á bumbunni hjá mömmu, bye bye.

Karatestrákur!

2007-08-10T11:33:00.000+12:00

Okkur langaði til að deila með ykkur myndum af Heiðari í Karategallanum sínum. Hann er sem sagt byrjaður að æfa aftur og hæst ánægður með það.

Skólastelpa!

2007-07-29T21:22:00.000+12:00

Fór til Auckland í síðustu viku til að sitja 2 daga kúrs í mastersnáminu mínu. Já mín bara orðin skólastelpa aftur. Auckland er mjög stór borg, eiginlega allt of stór að mínu mati. Mér líður betur í fámenninu í Christchurch bara 350000 :) Kúrsinn var fínn, þetta er aðferðafræði til að hjálpa mér við að fara að vinna að mastersverkefninu. Ætla að taka þetta frekar rólega en ef krílið verður eins þægt og Bergur segir að það verði þá get ég kannski tekið fleiri en einn kúrs í einu og byrjað á rannsóknarverkefninu. Sjáum hvað verður. Annars er allt fínt að frétta héðan. Bergur í lestir. Heiðar fann sér karateklúbb sem hann er ánægður með. Aðalþjálfarinn er þýskur maður um 55 ára og hann hefur verið á Íslandi að kenna og þjálfa, fyndið hvað heimurinn er lítill. Jæja nú er að fara að læra meira, undirbúa mig fyrir morgundaginn.

Ja hérna hér!

2007-07-10T22:48:00.000+12:00

Kiwifuglarnir að blogga! Já við vitum að upp á okkur skömmina, bloggletin hefur verið að drepa okkur eftir að við komum aftur til NZ eftir allt of stutta íslandsheimsókn. Annars er allt gott að frétta af okkur. Bergur er aftur farinn að lesa og lesa og lesa. Próf framundan í september. Heiðar átti góðann afmælisdag í júní og er núna í vetrarfríi í skólanum. Reyndar bara nokkrir dagar eftir af skólafríinu :( Hann hefur verið ýmislegt að bralla fór að klifra með Þorbjörgu og 2 vinum sínum. Átti frábæran feðgadag á skíðum. Bíóferðir og margt fleira skemmtilegt. Við ætlum reyndar að reyna að fara aftur á skíði á fimmtudaginn ef veður leyfir. Höfum ekki verið mjög heppin með veður ýmist lokað vegna of mikils vinds eða rigningar. Ég reyndar fer bara í barnabrekkuna, ætla að reyna að kenna Thomasi vini Heiðars á skíði. Þetta er smá brekka með svona 5 gráðu halla, svo ég og krílinu eigum að vera óhætt :)

Tvöföld gleði!

2007-05-12T21:01:00.000+12:00

Í dag var góður dagur við fögnuðum tvennu: Í fyrsta lagi elli minni orðin 36 ára gömul og í öðru lagi landvistarleyfi í Kiwilandi. Nú þurfum við ekki að vesenast með pappíra fram og til baka til útlendingaeftirlitsins og erum komin með almennar tryggingar svo nú getum við hætta að ljúga í læknana að þetta hafi verið slys. :) Nú er bara að vera í Kiwilandi í tvö ár og þá erum við komin með varanlegt landvistarleyfi og getum gert það sem okkur langar til en alltaf komið aftur til NZ. Neat, ay? Bóndinn minn og strákurinn okkar voru svo sætir við mig í morgun. Ég var vakin með fersku engiferte og ristabrauði. Svo höfðu þeir bakað, verkaskiptin voru víst þannig að Bergur hrærði og Heiðar sleikti sleifina. Útkoman var þessi svakalega góða súkkulaði kaka skreytt a la Heiðar. Siðan fórum við út í Hagley Park og nutum haustblíðunnar.

Samspil!

2007-04-26T10:12:00.000+12:00

Eitt kvöldið voru haldnir samspils tónleikar Bergs og Heiðars þar sem frumflutt var verk eftir Heiðar Örn. Þetta var þræl skemmtilegt að hlusta á þó það hafi nú verið dálítið sérstakt. Svo fékk Bergur að prófa saxafóninn og Heiðar að prófa þverflautuna. Bergur fílar saxafóninn alveg í botn. Ja, þetta gekk ágætlega, ég allavega tók myndir áður en ég yfirgaf stofuna :)

Feiti kisi - Mjási

2007-04-26T09:56:00.000+12:00

Hvað haldi þið? Fundum þriðju kisuna, réttara sagt þá finnur Bergur þessar kisur og kemur með inn :) Þessi kisi er svakalega stór og mikill og gengur undir nöfnunum Feiti kisi eða Mjási. Hann er ný fluttur í húsið við hliðina á okkur. Aumingja Randý litli hefur ekki komið í heimsókn síðan Feiti kisi fór að venja komu sína til okkar. Því Feiti kisi situr alltaf upp á grindverkinu þar sem gatið er í gegnum það því hann sá Randý hlaupa þar í gegn um daginn. Heiðar er hæst ánægður með Feita kisa því hann vill helst vera í fanginu á honum að láta klóra sér og strjúka :)

Gleðilega Páska!

2007-04-07T22:15:00.000+12:00

Á morgun er páskadagur. Heiðar og Bergur hafa falið eggið mitt svo vel að ég mun aldrei finna það. Við Heiðar földum eggið hans Bergs líka vel, hann finnur það ekki fyrr en í sumar :) Nú er bíða þar til stubburinn er farinn í rúmið svo við foreldrarnir getum skemmt okkur við að fela hans egg. Já og svo er að ákveða hvort við eigum að fela alla bitana (aumingjans eggið varð fyrir smá hnjaski á leiðinni til Heiðars, er í tugum mola) af stóra flotta egginu sem hann fékk sent að heiman eða hvort við eigum að fela það allt saman :D Hmm, hann er bara svo svakalega góður í að finna þau, við þurfum að leggja höfuðið vel í bleyti og hugsa upp góða staði.
Við óskum ykkur Gleðilegra Páska og vonum að þið hafið jafn gaman að eggjaleit og við ;)

Dunedin

2007-03-21T14:45:00.000+12:00

Um helgina fórum við mæðginin í helgarferð með Flakkaranum að heimsækja Rosie sem býr í Dunedin. Bærinn er í svona 4-5 tíma akstur frá ChCh 120000 íbúar og þar af 20000 háskólastúdentar. Ferðin niðr eftir gekk bara vel, 27 stiga hiti í Ashburton en lækkaði talsvert þegar við komum suður til Dunedin. 16 stiga hiti, skítakuldi og rok. Það var St Patricks Day á laugardaginn, háskólastúdentarnir allir klæddir í grænt og vel fullir. Við fórum út að borða á Víetnamskan stað sem var fínn og svo fórum við í bíó á mynd sem heitir Hot Fuzz. Mæli eindregið með þessari gamanmynd, frekar svartu breskur húmor. Á sunnudaginn var erftitt að ná Heiðari fram úr því hann hafði fengið leyfi hjá Rosie að taka fartölvuna hennar upp í rúm til sín og þar lág hann og horfði á Scrubs, kósý :) En þegar við Þorbjörg sögðum honum að við ætluðum að fara að skoða Cadbury súkkulaði verksmiðjuna þá var minn ekki lengi á fætur. Við sem sagt fórum að skoða hana, en fengum bara mini ferð um svæðið þar sem verksmiðjan er lokuð um helgar. En Cadbury búðin var opin og Heiðar fékk að velja páskaeggið sitt. Okkur langaði til að fara að skoða Speights bjórverksmiðjuna en ákváðum að það væri skemmtilegra að gera það einhverja aðra helgi barnlausar. Við gengum um bæinn og kíktum á Dómkirkjuna sem er byggð úr steinum sem fluttir voru frá Oamaru. Skoðuðum lestarstöðina sem er geysilega flott bygging. Sagt er að þetta er ein sú mest myndaðasta byggingin á Nýja Sjálandi. Á leiðinni út úr bænum fórum við að götu sem talin er sú brattasta í heimi 38 ° halli, ef ég man rétt. Við vildum nú ekki keyra upp hana en Heiðar og Þorbjörg fóru upp. Ég var eftir niðri og tók myndir, fyndið að sjá ofan á bílana á leiðinni upp og niður, svo mikill er hallinn. Við ætluðum að keyra beint til ChCh en það var nú ekki hægt að sleppa tækifærinu að skoða "TheYellow eyed Penguins" Gul eygðar mörgæsir, við vorum akkúrat á ferðinnni á þeim tíma sem þær eru að koma að landi. Mikið svakalega eru þær sætar og þvílíkt sem þær ná að klifra upp í hlíðarnar við ströndina, ótrúlegar. Þetta var mjög góð helgi við eigum örugglega eftir að kikka á Dunedin aftur. Myndir hér

Haustið kom í morgun!

2007-03-13T10:43:00.000+13:00

Haustið kom í morgun. Það er grenjandi rigning og lauf út um allt. Þetta gerist frekar hratt, svona Monty Python tré út um allt :) Eitt lauf fellur, "plaff" öll laufin henda sér af trjánum. Nú er bara að bíða eftir snjónum í fjöllin í Canterbury, reyndar var í fréttunum í morgun að það er farið að snjóa í fjöllin í Fjordlands, sunnalega á suðureyjunni. Við fjárfestum nefnilega í skíðapössum um daginn, jibbííí. Getum varla beðið. Það er planað að opna Mt Hutt 9 Júní.

Nú eru 10 dagar í að Bergur fljúgi til Brisbane. Spennann er í hámarki. Hann les myrkranna á milli, mjög einbeittur og duglegur. Oh hvað það verður gott þegar prófin eru búin. Mig langaði að halda partý en Bergur vill komast út úr bænum. Það get ég reyndar skilið mjög vel. Svo nú er að plana skemmtilega ferð. Ganga? Tjald? Hjólaferð? Það er svo margt skemmtilegt hægt að gera!! En nú þarf ég að finna út hvað er Brisbane er fræg fyrir, þarf að Google þetta.

Læt hérna mynd af Mt Hutt skíðasvæðinu. Draumur!!

Tónlistarmaður

2007-03-07T09:50:00.000+13:00

Heiðar er byrjaður að læra á saxafón. Fær kennslu í skólanum á hverjum mánudegi. Bergur hafði farið síðasta föstudag og leigt fyrir hann saxafóninn, svo þegar við komum heim á sunnudaginn var mikil spenna að prófa, heyra hvort hann næði tóni. Því það er víst nokkuð erfitt að ná góðum tóni úr þessu. En strákurinn setti hann saman með hjálp pabba síns og náði líka þessum flottu tónum. Gott að eiga ættir að rekja til þingeyinga sem er fullir af lofti ;)

Íslendingamót í Hastings

2007-03-04T22:12:00.000+13:00

Jæja nú erum við mæðginin komin heim eftir mjög skemmtilega helgi. Við flugum á Wellington, höfðuborg Nýja Sjálands, á föstudagsmorguninn. Gengum um miðborg Wellington og fórum í Te Papa safnið. Þetta er safn á 6 hæðum sem tekur meira en einn dag að skoða. Eitt flottasta safn sem ég hef komið í. Svo um eftirmiðdaginn var keyrt til Hastings, um 4 tíma keyrsla þangað upp eftir. Hastings er í Hawks Bay sem er eitt helsta ávaxta- og vínræktunarhérað nýsjálendinga. Mjög góð vín sem koma frá þessu héraði. Við komum frekar seint um kvöldið á áfanga stað og þeir íslendingar sem enn voru vakandi voru eiturhressir að þjóðlegum vanda. :) Á laugardeginum fórum við í vatnsrennibrautargarð og skemmtum okkur konunglega. Því næst fórum við að skoða ostagerð, þar sem búnir voru til fjölmargar tegundir af ostum úr mismunandi mjólk, þe. kúamjólk, geitamjólk og sauðamjólk. Svo fórum við að skoða hunangsgerð og smökkuðum á mismunandi tegundum af hunangi, ég bara vissi ekki að það væru til margar tegundir. Um kvöldið gæddum við okkur á grillmat, sviðakjömmum, rúgbrauði, kleinum og pönnukökum með rjóma. Að ógleymdu harðfiski, hákarli og brennivíni sem er hreint ómissandi með. Svo þegar söngvatnið var farið að virka þá voru tekin upp söngheftin og sungið, hver með sínu nefi. Eina sem vantaði var gítarinn. Nú er bara að fara að safna í ferðabaukinn til að komast á næsta íslendingamót en það verður haldið aftur á norðureyjunni rétt fyrir utan New Plymouth.

Allt í bland....

2007-02-28T09:32:00.000+13:00

Við Heiðar erum orðin spennt að komast í okkar litla ferðalag til norðureyjunnar. Fljúgum til Wellington á föstudagsmorguninn. Vona að við fáum gott verður allavega á laugardeginum, þá er planið að fara í sundlaugargarð í Hastings. Bergur verður heima að lesa og lesa. Ég reyndar dáist að honum að geta einbeitt sér í þeim hita sem hefur verið. Í fyrra dag var 32°C, en í dag er skýjað og ekki nema um 18°C, bara skítakuldi :) Ætli haustið fari nú ekki að bresta á. Minnir mig á það við þurfum að huga að skíðapassakaupum, eigum við að kaupa fyrir einhverja fleiri?? :D

Flökkukisi!

2007-02-25T23:14:00.000+13:00

Randý hefur nú gerst flökkukisi. Hann fór í smá skoðunar leiðangur eitt kvöldið en fór því miður í garðinn þar sem stóri hundurinn á heima. Greyið varð svo hræddur að hann skreið ekki fram út felustað sínum fyrr en um tvö leytið um nóttina. Þrátt fyrir að eigendur hans fóru að grindverkinu og kölluðu á hann. Bergur var að lesa um nóttina og heyrði í honum. Kom með hann inn og litla greyið gisti hjá okkur um nóttina. Heiðar hafði miklar áhyggjur af honum. Hann var því ánægður þegar hann sá hann um morguninn heilann á húfi.

Hjóladagur

2007-02-21T15:27:00.000+13:00

Á sunnudaginn fórunm við í smá hjólatúr um hverfin í kring. Kiwiar eru nú sniðugir að hafa hjólastíga svo við þurfum ekki að hjóla í mikilli umferð. Svo var farið í BMX- hjólgarð þar sem flottir hólar hafa verið útbúnir svo krakkarnir geta leikið sér á hjólunum sínum, stokkið og fleira. Heiðar er svaka duglegur að fara hólana og stökkva. Bergur prófaði líka á hólinu hans Heiðars. Að loknum æfingahringjum fóru þeir í kapp. Heiðar vann með miklum yfirburðum :)

Konudagurinn

2007-02-19T22:47:00.000+13:00

Í dag fékk ég þær fallegustu rósir sem ég hef nokkurn tíman fengið. Og svo ilma þær, ég man ekki eftir að hafa fundið svona góðann ilm af rósunum heima :) Kannski hefur það áhrif að þetta er fyrsti blómvöndurinn sem ég fæ frá mínum ektamanni eftir að ég varð hans ektakona ;)

Lífið gengur sinn vanagang.....

2007-02-17T00:32:00.000+13:00

Það er lítið að frétta af okkur hérna suður með sjó. Allt er að komast í fastarskorður aftur eftir sumarfrí. Heiðar Örn er byrjaður í skólanum, bara sáttur við það. Hann er í sérstökum E-bekk sem er einskonar electronic bekkur. Þau vinna mikið af sinni vinnu á tölvur, leita á netinu af upplýsingum og skila allri sinni heimavinnu á tölvutækuformi. Það er annað hvort á diski eða senda kennaranum rafrænt. Þetta er mikið framtak þar sem nýsjálendingar eru frekar aftarlega á merinni í sambandi við tölvur. Bekkurinn fékk 12 fartölvur til að vinna á í skólastofunni sinni, þau vinna 2 saman á hverja tölvu. Þetta kennir þeim líka dálítið um samvinnu. Heiðar finnst þetta mjög spennandi. Bergur er mjög duglegur að lesa. Nú fer að styttast í prófin hans, mikið flýgur tíminn áfram. Næst á dagskrá hjá okkur Heiðari er að ferðast til norður eyjunnar á íslendingamót sem er haldið í Hastings í byrjun mars. Við munum fljúga á Wellington og keyrum þaðan upp til Hastings. Okkur er farið að hlakka til þessa að ferðast meira. Já meira er ekki af okkur að frétt í bili. Þangað til næst, bless bless. :)

Óvænt heimsókn!

2007-02-06T16:44:00.000+13:00

Við fengum óvænta heimsókn í fyrradag. Tveir litlir kettlingar dúkkuðu upp í garðinum okkar. Þeim var auðvitað sýnd gestrisni og boðið í bæinn og að sjálfsögðu býðu maður gestunum eitthvað að borða og drekka. Kettlingarnir sleiktu vel út um eftir að hafa fengið túnfisk og mjólk. Heiðar tók að sér það verkefni að ganga um götuna og banka upp á til að hafa upp á eigendunum. Hann var nú ekki lengi að skvera sér í sandalana sína og kom aftur eftir ekki nema 10 mín og hafði þá haft upp á eigendunum. Þannig er að garðarnir okkar liggja saman, kettlingarnir (Systkinin, Randy og Missy) klifruðu upp stórt tré, yfir á grindverkið hjá okkur og niður í okkar garð. Svaka dugleg, að þeirra áliti ;) Nú halda þau að þetta er nýjasti partýleikurinn, gerðu þetta aftur morguninn eftir og aftur núna í morgun. Sem betur fer eru eigendur þeirra vinsamlegasta fólk og gaman að tala við þau. Þau hafa boðið Heiðari að koma að leika við kettlingana þegar hann vill og nýtti hann sér það í morgun. Það undarlega við þetta allt saman er að Bergur finnur ekkert fyrir ofnæmi af þeim, kannski af því að þeir eru rétt 11 vikna og eru enþá með mjúka kettlingafeldinn sinn. Læt mynd af þeim fylgja.

Missy og Randy

Heiðar Örn með Randy

Christchurch til Farwell Spit

2007-01-28T18:26:00.000+13:00

Við fórum í mjög skemmtilega ferð um þar síðustu helgi. Keyrðum upp austur ströndina í gengnum Kaikora, einn helsta hvalaskoðunar staðinn í suður eyjunni. Einn íslenskur vinur okkar var að ferðast þar um daginn og þegar hann kom aftur í vinnuna hérna í CHCH þá var hann spurður að því hvort hann hefði nú ekki farið í hvalaskoðun en hann svaraði því neitandi: Sko, þeir vildu ekki hleypa mér um borð með skutulinn minn. Kiwiunum fannst þetta lítið fyndið. Reyndar fórum við ekki í hvalaskoðun því við vildum komast sem fyrst til Nelson því planið var að fara í dagsferð í Abel Tasman. Þó var stoppað á leiðnni og horft á selina leikasér. Þeir eru nú svo sætir og skemmtilegir að horfa á. Á laugardeginum keyrðum við til Marahau og tókum Water Taxi til Bark Bay. Þaðan gengum við til Torrent Bay. Þetta er um 3 tíma ganga, alveg geysilega falleg. Við fengum alveg frábært veður frekar skýað en mjög hlýtt. Sólin náðu þó að brjótast fram af og til, sérstaklega þegar við komum niður á gullnustöndina í Torrent Bay. Þetta var engu líkt. Síðan tókum við Water Taxi aftur til baka til Marahau, mér finnst það alveg snilld að sigla um á hraðbát og enda svo ferðina upp á traktórskerru. Um kvöldið fórum við út að borða í gamal kirkju sem breytt hafði verið í veitingastað. Einhver hefði nú mótmælt að barinn var staðsettur þar sem altarið hafði verið. En er nú ekki veitt áfengi á báðum stöðum. Heiðar fékk sér í fyrsta skipti steinasteik og fannst honum hún algert lostæti. Hann gat haft kjötið eins hrátt og hann vildi. Á sunnudeginum fórum við áfram upp upp með ströndinni alveg upp til Farwell Spit sem er nyrsti oddi suður eyjunnar. Ákveðið var að taka innland leiðina til baka til CHCH. Sú leið er mjög falleg. Mæli eindregið með að fara í Abel Tasman og ganga um þjóðgarðinn. Við Bergur erum samála því að þetta er eitt fallegasta svæði sem við höfum komið á og munum örugglega fara þangað aftur.

Akaroa :)

2007-01-23T23:45:00.000+13:00

Við mæðginin höfum verið frekar dugleg að ferðast síðan Silla amma kom. Það er svo gaman að sýna öðrum staði sem eru fallegir og líka upplifa nýja staði með þeim. Um daginn fórum við í dagsferð til Akaroa. Bær sem er hérna í 2 tíma fjarlægð frá CHCH. Hann er á Banks Penninsula sem var eyja þar til fyrir 25000 árum þá við eldgos sameinaðist hún meginlandinu. Akaroa er bær sem var byggður upp af frönskum hvalveiðimönnum þar af leiðandi eru sterk frönsk áhrif. Sæt lítil kaffihús með frönskum nöfnum og fleira. Á leiðinni tókum við upp í puttaling. Þetta var kona um 60 sem gisti í sumarfríinu sínu á prestsetrinu í Govenors Bay og svo ferðaðist hún um gangandi eða á puttanum og skrifaði. Hún var hálf Pólsk og hálf Kiwi. Hún reyndist vera hin skemmtilegasta kona, spjallaði heilmikið en hlóg aðeins of hátt fannst Heiðari. Mamma hennar hafði komið til NZ sem barn, pólsk að uppruna en sem barn þá bjó hún í fangabúðum í Síberíu. Eftir seinni heimstyrjöldina fluttu rússar fjöldann allann af pólverjum, sem áttu land sem rússinn vildi eignast, til Síberíu. Rússarnir fluttu þá aðila sem voru menntaðir, höfðu baráttuvilja og myndu hugsanlega settja sig upp á móti þeim við þennann stuldur. Um 60 börn þessa fólks komu sem flóttamenn til NZ frá Síberíu. Mér fannst þetta merkilegt, þar sem ég hafði ekki heyrt um þetta eða lesið. Mig langaði bara að deila smá af sögu þessarar konu með ykkur. Við fengum að vita heilmikið um þessa konu, eins og ég gat um áður þá var þetta 2 tíma keyrsla, sem betur fer hafði konan mikla frásagnargáfu :)
Myndin er frá Okain Bay.

Silla amma komin!!

2007-01-11T23:29:00.000+13:00

Nú er Silla amma komin til okkar með Ora baunir í baunasalat, harðfisk, Bangsímoninn hans Heiðars og Síríus orangesúkkulaði í jólaísinn. Við héldum litlu jólin á laugardaginn, enn eitt pakka flóð. Við vorum með lambalæri frá Nýja Sjálandi, heimagert rauðkál og alvöru jólaís með orangesúkkulaðinu. Og aftur borðuðum við á okkur gat ;) Við höfum tekið því rólega á meðan Silla amma er að aðlagast tímamismuninum svo er á plani að fara í ferðalag um eyjuna. Reyndar hefur verið rigning um alla eyjuna síðan á þriðjudaginn en við vonum að það verði gott veður í næstu viku. Á laugardaginn fórum við niður í bæ og hlustuðum á Heru syngja á Art Center alltaf jafn gaman að hlusta á hana. Við skoðuðum markaðinn sem er þar hverjum laugardegi. Í Art Center sjálfu eru nokkur mismunandi handverkstæði sem líka er gaman að skoða, smíðaverkstæði, beinaútskurður og fleira. Að ógleymdu Fudge Cottage þar sem er handgert nammi, súkkulaði, brjóstsykrar og fudge með alskonar bragði. Á morgun er á áætlun að fara í Canterbury Museum

Godley Head Circuit - Otokitoki

2006-12-28T17:17:00.000+13:00

Við fórum í smá göngutúr í gær. Lögðum af stað frá ströndinni við Taylor´s Mistake og gengum í áttina að Lyttelton. Þetta er í rauninni 5 tíma ganga en við fórum bara part af henni. Ákváðum að gera þetta stutta og skemmtilega göngu fyrir Heiðar. Þarna eru "baches" sem eru litlir sumarbústaðir. Upprununalega áttu piparsveinar "bachelors" sem fiskuðu frá ströndinni heima þarna en þaðan er nafnið á sumarbústöðunum komið stytting, bach. Svo eru á leiðinni nokkur skotbyrgi frá því þegar nýsjálendingar óttuðust árás frá japönum. Þetta er mjög skemmtileg leið en algerlega ófarandi í og eftir ringningu, stígarnir eru allir gerðir út mold. Það hafði rignt um morguninn og Heiðar hafðir áhyggjur af því að við myndum nú bara renna niður í sjó :) En þegar sólin skín hérna þá þornar allt frekar hratt, göngustígar, gróður, þvottur og fleira :)

Gleðlieg Jól

2006-12-25T15:31:00.000+13:00

Gleðileg Jól allir saman. Við höfum haft það mjög gott hérna á Nýja Sjálandi. Í dag jóladag er um 20 stiga hiti og sól. Aðfangadagskvöld var indælt, við fengum tvö pör í mat til okkar. Í forrétt var rækjukoktail, aðalrétturinn var kalkúnn, waldorfsalat, sykurhúðaðar kartöflur og púrtvínssósa og í desert var amerískt eplapæ. Við borðuðum á okkur gat að íslenskum sið. Síðan voru gjafirnar teknar upp, allt fljótandi í jólagjöfum. Heiðar var alsæll með allt sem hann fékk. Hann hefur planað sumarfríið sitt í flugdreka flug, tölvuleiki og bókalestur svo eitthvað sé nefnt. Bergur fékk gítar og var hinn ánægðasti og ég fékk mína jólabók. Nú get ég ekki beðið eftir að fara að lesa :) Svo var jólahádegisverðarboð hjá okkur í dag, hangikjöt, uppstúfur, rauðkál, grænarbaunir og laufabrauð. Mjög þjóðlegt. Þannig að aftur er maður orðinn afvelta. Á morgun er síðan jólastrandferð til að kafa eftir pauaskeljum. Það verður örugglega skemmtilegt.

Jólin, Jólin alstaðar.....

2006-12-24T00:49:00.000+13:00

Í dag fórum við í þessa flottu skötuveislu í Eskimócenter í Lyttelton. Hilmar hafði lagt í skötu fyrir mánuði síðan og var hún hið mesta lostæti. Við Bergur bjuggum til flatkökur sem heppnuðust mjög vel og fjölskyldan í Valhöll kom með ljúffengt rúgbrauð. Við átum okkur gat, töluðum yfir okkur á íslensku og skoluðum þessu öllu saman niður með brennivínssnafsi :) Síðan var haldið heim og jólaundibúningnum haldið áfram. Bergur og Heiðar tóku inn jólatréð sem við höfðum keypt af frekar skuggalegri konu í enþá skuggalegri garði fyrir framan skuggalega húsið hennar. Kaupin voru frekar hröð, fundum tré sem okkur líkaði og síðan sagði Bergur: María, borgum og förum! Jólatréð skreytti Heiðar af algjöri snilld. Hérna er útkoman, flottasta tré sem við höfum haft, held ég bara. Jafn grænt og grasið í garðinum fyrir utan ;)

Þegar piparkökur baka.......

2006-12-18T21:11:00.000+13:00

Mikið var um að vera síðasta fimmtudag í Escimo-center í Lyttelton. Við komum saman nokkur til að baka laufabrauð, piparkökur, fá okkur jólaglögg og hlusta á íslensk jólalög. Bergur og Hilmar stóðu sveittir við að fletja út laufabrauðkökurnar. Á meðan við stelpurnar, ég, Svava og Birna Líf. Flöttum út piparkökudeig og stungum út hinar skemmtilegustu fígúrur. Við fengum síðan liðsauka frá Þorbjörgu og Heiðari. Og að síðustu kom Mikki. Þegar búið var að baka piparkökurnar og álfaprinsessan Birna Líf farin að sofa. Settumst við hin niður og skárum út laufabrauð, með misgóðum árangri. Aðferðinar voru mismunandi en kökurnar heppnuðust mjög vel. Veðrið var það svakalega gott að Hilmar fór með steikarpottinn út á svalir og steikti allar fabrauðskökurnar þar á stuttermabolnum. Það er skrítið að finna þennann hita í loftinu og það eiga að vera að koma jól. Það er alltaf eitthvað sem maður upplifir í fyrsta skipti :)

Garðálfar

2006-12-03T22:56:00.000+13:00

Nú er sumarið loksins komið hjá okkur með tilheyrandi garðvinnu. Heiðar Örn er duglegur að hjálpa til við garðvinnuna. Bergur kenndi honum á slátturvélina, hvað hann ætti að varast og alltaf ganga um grasið áður en hann slær og skoða vandlega hvort það eru nokkrir steinar eða annað sem gæti skotist í fæturnar á honum. Heiðar gerir þetta samviskusamlega og finnst þetta bara mjög gaman. Þetta er reyndar í fyrsta skipti sem við höfum garð og erum eiginlega dálítlir álfar með hann. Bergur er þó með þetta í blóðinu frá mömmu sinni ;) Þetta er nú samt dálítið undarlegur garður að mínu mati. Í vor blómstraði hann á fullu en núna er komið sumar og það er varla blómaknúbb að sjá. Ég sem var að vona að hann yrði í blóma þegar mamma kæmi út til okkar. Kannski á eftir að rætast úr þessu blómaleysi og við verðum á endanum flottir garðálfar :)

Siglingadagur Cobham

2006-11-30T10:02:00.000+13:00

Á mánudaginn var siglingadagur hjá Heiðari. Bekkurinn fór saman að læra að sigla á jullum á Lake Ruha sem er rétt fyrir utan Christchurch Ég fór með til aðstoðar, við vorum 5 foreldrar sem fórum með. Dagurinn byrjaði eins og fínasti sumardagur. Það var reyndar til vandræða því lítið blés í seglin hjá krökkunum. Heiðar reyndi að blása sjálfur en var punkteraður eftir smá tíma. Fyrst fengu krakkarnir kennslu á þurrulandi, setja saman bátana og öryggi á vatninu. Svo var farið út á vatnið 2-3 bátar í einu. Þegar allri voru orðnir klárir þá máttu allir bátarnir fara út í einu. Siglingaleiðbeinendurnir voru á tveimur Zodic bátum á vatninu með krökkunum. Krakkarnir voru 3 saman á bát en það mátti bara einn fara út á bátunum í einu. Heiðar stóð sig eins og hetja sigldi um allt eins og hann hefði aldrei gert neitt annað. Eftir hádegismatinn og leiki, þar sem við Heiðar kenndum þeim að hlaupa í skarðið. Sá leikur vakti mikla hrifningu nema hringurinn var dálítið losaralegur þar sem stelpa og strákur áttu að leiðast ;) Vindurinn hafði loksins komið og allri fóru aftur út á bátunum. Allir áttu að æfa sig fyrir keppnina miklu sem var seinna um daginn. Kappið var svo mikið í skiptingunum í bátana og að komast til baka eftir að hafa siglt út að baujunni að Heiðar velti. Þar kom sér vel að hann hafði æft kayjak veltu með pabba sínum í Abel Tasman. Strákurinn var snöggur upp á bátinn og velti honum aftur til baka einn síns liðs. Sterkur strákur! Svo var keppnin þar sem 7 voru saman í liði og þið getið rétt ímyndað ykkur lætin og gusuganginn sem gekk á. Það voru margir sem voru orðnir bláir af kulda því þeir lentu í vatninu og það hafði dregið fyrir sólu. Þetta var stórskemmtilegur dagur. Heiðar er jafnvel að spá í á að fara á siglingarnámskeið í sumarfríinu.

Mowember

2006-11-14T00:48:00.000+13:00

Núna er Nóvember eða Mowember hjá sumum karlmönnum sem taka þátt í að vekja athygli á krabbameini í blöðruhálskirtli. Það er að segja, þeir sem taka þátt rökuðu sig í byrjun nóvember og eru að láta sér vaxa yfirvaraskegg í þessum mánuði. Þetta er svona vex mis vel og er útkoman mis flott. Ekki eru allar eiginkonur, kærustur og vinkonur jafn hrifnar af þessu þrátt fyrir að þær eru allar af vilja gerðar og einbeitta sér að hugsa að þetta sér gert fyrir góðann málstað. Ein kona hérna í bænum sagði sínum manni að ef hann ætlaði að láta sér vaxa yfirvaraskegg þá myndi hún ekki raka sig undir höndunum í eitt ár. Á þeim bæ var yfirvaraskeggið fljótt að fjúka. Man ekki hvort hann átti að sofa í stofunni í einn mánuð líka, það gæti hafa haft áhrif á ákvörðun hans. Minn maður hefur verið duglegur að hafa alskegg og mér hefur fundist það fara honum bara vel en þetta yfirvara skegg er hreinasta hörmung. Ég verð fegin þegar nóvember - mowember er liðinn.

Matarboð með Twister

2006-11-12T19:50:00.000+13:00

Við fórum í matarboð til Einars og Carolyn á laugardaginn. Þar mættu Lytteltonarnir, Mikki og Rosie kærastan hans ásamt okkur. Vömbin var heldur betur kýld út af góðum mat og yndislegum eftirrétt. Veraldarmálin rædd og aumingja Rosie þurfti að svara fyrir afhverju Kiwiarnir fara svona að þessu. Toppurinn á kvöldinu var svo samkvæmisleikurinn Twister. Við stelpurnar kepptum og vorum við Carolyn þær sem sem voru eftir, Rosie greyið var komin í þvílíka flækju. Mikki fann út nýja leik aðferð, þegar hann náði ekki á þann lit sem annað hvort höndin eða fóturinn átti að vera á þá einfaldlega dróg hann til sín Twister teppið til að ná í réttann lit. Hann var nú fljótlega dæmdur úr keppni :) Einar sýndi og sannaði að vera í sambúð með Pilates kennara hefur sína kosti ;) Heiðar var sigurvegari kvöldsins en hann vann alla sem hann skoraði á í keppni. Meira hvað strákurinn er liðugur.

Rokrassgat!

2006-11-03T02:02:00.000+13:00

Það var svo mikið rokið inni á baðherberginu okkar í dag að skeggið fauk af Bergi. Fyndna var að vindstrenginn lagði bara öðrumegin á andliti hans til að byrja með. Bergur leit út eins og Dr. Jekyll and Hyde (eins og sést á meðfylgjandi mynd). Reyndar var hann að spá í að hafa þetta bara svona, honum finnst svo gaman að heyra fólk vera ósamála :) Skapa umræðu, Skapa umræðu!

Íþróttaálfurinn Heiðar Örn :)

2006-10-31T23:15:00.000+13:00

Íþróttadagur Cobham Inermediate var á föstudaginn síðasta. Heiðar keppti þar í hástökki, spretthlaupi, langstökki, kúluvarpi og diskakasti. Heiðar var valinn í 100 m boðhlaupssveit síns bekkjar og urðu þau í 3 sæti í sínum riðli, en því miður komust þau ekki í aðalúrslitin. Strákurinn stóð sig svakalega vel, naut dagsins í botn og kom heim sólbrúnn og sæll :)

Picnic

2006-10-23T21:53:00.000+13:00

Á laugardaginn fórum við til Corsair Bay sem er rétt fyrir utan Lyttelton (sem er rétt fyrir utan Christchurch). Mjög falleg lítil vík með hvítri strönd og grasbala þar sem við settumst niður og snæddum brunch. Heiðar var mikill víkingur og fór að synda í sjónum. Hann langaði mikið að synda út á pramma sem var rétt fyrir utan ströndina. Um leið og hann gat synt meðfram ströndinni án þess að láta fæturnar snertabotninn mátti hann synda út að prammanum. Bergur synti með honum og þeir skemmtu sér konunglega. Þetta var mjög fallegur dagur og frekar hlýtt en sjórinn var ekki hlýr. Læt mynd af hraustu víkingunum fylgja með.

Sérnám í dýralækningum?

2006-10-18T20:02:00.000+13:00

Bændurnir í Lyttleton lent í vandræðum um daginn. Sagan segir að þeir hafi staðið fyrir ólöglegu hænsnaati en ég sel það ekki dýrara en ég keypti það. Í það minnsta varð stofnhænan fyrir áfalli og hætti að nota annan fótinn. Nú voru góð ráð dýr. Ég reyndi að sannfæra Hilmar og Svövu um að réttast væri að grilla hana en litlu hjörtun voru ekki alveg til í það svo ákveðið var að spellka hana. Hvernig fer maður að því að spellka hænu? Aftur voru borgarbúarnir farnir að rifja upp sögur um fullar hænur í sveitinn en maður á að fletta því upp sem maður veit ekki og Google sagði að það væri mjög gott að nota Eter. Það eru ekki nema rúm 130 ár frá því að menn hættu að svæfa með eter og sagan segir að hænum fynnst lyktin mjög góð. Eftir að hafa beitt öllum okkar samböndum komst Hilmar að því að Christchurch Public Hospital átti eina flösku af Eter.
Þá var bara að smíða svæfingavél fyrir hænur og gekk það hratt fyrir sig. Pappakassin með dropagati og glæru gægjugati svæfði ekki hænuna en slæfði hana ágætlega, þá var hún gripin og haldið grisu vættri í Eter fyrir andlitinu. Deila má um hvort hænan eða svæfingarlæknirinn voru slæfðari en hægt var spelka skeppnuna með súperdúperspellku.
Nánari fréttir koma síðar af bata hænunar en það er amk búið að bjóða okkur í mat á laugardaginn og ég veit að það verður ekki bara grænmeti í matinn.

Abel Tasman - Sjókayjakferð

2006-10-11T23:48:00.000+13:00

Sjókayjak ferðin 22-26 sept var mjög skemmtileg. Við fórum af stað á fimmtudegi, 5 saman. Ég, Bergur, Heiðar Örn, Þorbjörg og Mikki. Ferðaáætlunin var að sigla frá Marahau til Onetahuti með viðkomu við Tonga Island. Áætlaður ferða tími voru 3 dagar, gist í 2 nætur í skálum. Motueka var fyrsta stopp okkar fyrir siglinguna, reyndar gistum við bara hálfa nótt því þetta var 6 tíma akstur frá Christchurch norður Suðureyjuna. Næsta dag fórum við til Marahau þar sem við leigðum kayjakana. Eftir miklar vangaveltur um hvað ætti að fara með og hvað væri óþarfi lauk pökkunninni í bátana. Reyndar var tveggja manna báturinn sem Bergur og Heiðar voru í með svo stór hólf til að pakka drasli að við hefðum komið hústjaldi og 4 brennara BBQ fyrir í honum. Við skoðuðm veðurspánna með kayjakstráknum á leigunni, fórum yfir helstu öryggisatriði á bátunum og lögðum svo af stað niður að strönd. Sjósetning tókst vel og við tókum stefnuna á Adele Island sem er rétt fyrir utan Marahau. Þar fengum við okkur hádegismat og hittum selinn Snorra. Fyndinn selur sem var með mikla sýningar þörf og ferlega forvitinn. Skemmtilegar skeppnur. Fyrstu nótti gistum við á stað sem heitir Anchorage. Mjög fallegur staður. Þorbjörg bauð upp á flottann, sterkann indverskann mat og rauðvín. Í tilefni þess að hún væri laus úr gifsinu og loksins farin að gera eitthvað skemmtilegt.
Dagur tvö var eins fallegur og dagur eitt. Sól, blíða og varla hræðist hár á höfði. Stefnan var núna á Bark Bay. Þetta var stuttur siglingadagur svo við fórum í skoðunarferð um Torrent Bay, komum við hjá Pinnacle Island. Þar voru klettarnir fullir af selum, stórum og smáum. Stoppuðum á fallegri strönd sem ég man ekki hvað heitir. Fengum okkur hádegismat og vorum étin sjálf af sandflugum. Aumingja Bergur fær alltaf flest bitin. Við vorum með bitvarnarkrem sem átti að vera voða gott en ekkert dugði. Í Bark Bay fékk Heiðar að prófa að velta bátnum með pabba sínum, Mikki stóð við hliðina á bátnum til öryggis. Stráksi var alveg með þetta á hreinu hvernig hann ætti að losa sig úr bátnum og hjálpa pabba sínum að koma honum á kjölinn. Þegar hann hafði prófað þetta einu sinni þá vildi hann bara velta aftur. Og þeir veltu aftur. Síðan fóru Bergur, Mikki og Þorbjörg í smá siglingu. Við Heiðar fórum á meðan í þá köldustu sturtu sem við höfum nokkurn tíman upplifað. Þetta var í rauninni bara garðslanga inni í rjóðri, inn í miklum og þykkum gróðri. Ég stóð vaktina á meðan Heiðar fór í sturtu og svo stóð stráksi vaktina á meðan ég saup hveljur í sturtunni. Skálinn í Bark Bay er mjög hugglulegur. Með ofni og hreinu drykkjarvatni. Maður þarf að passa sig á að drekka bara filterað drykkjarvatn sem er sérmerkt á krönunum eða nota sérstakar töflur til að drepa snýkjudýrin sem eru í vatninu.
Þriðji dagurinn var ansi vindasamur. Við þurftum að sigla beint upp í vindinn. Við lögðum af stað en ég og Bergur náðum ekki að komast til Onetahuti, vindurinn var allt of sterkur. Svo við enduðum í aftur í Bark Bay. The Water Taxi átti að pikka okkur upp í Onetahuti en um morguninn hafði hann komið við í Bark Bay og sagði okkur að vindurinn ætti að vera sterkur í dag svo hann gæti alveg sótt okkur í Bark Bay í staðinn, sem var fínt. Við flatmöguðum bara á stöndinni meðan við biðum eftir því að vera pikkuð upp af Water Taxi. Leiðinlegt að missa af Tonga Island því að þar er uppeldisstöð selanna, þar sem þeir læra að synda og bjarga sér í sjónum. En við förum bara þangað næst :) The Water Taxi fór með okkur til Marahau með vikomu á nokkrum stöðum. Ég hef aldrei endað sjóferð í hraðbát sem sigldi beint upp á kerru aftan á traktór og vera keyrð í bátnum að kayjakleigunni, það var mjög spes. Frá Marahau keyrðum við til Nelson þar sem við gistum á notalegu móteli. Allavega var mjög notarleg sturta þar, heit og góð. Um kvöldið fórum við út að borða og í smá göngutúr um Nelson. Mig langar til að koma til Nelson og skoða þá borg betur síðar. Það var gott að vera úthvíld fyrir löngu keyrsluna til Christchurch. Þetta var ferð sem seint verður endurtekin. Nú er að finna nýjan flottann stað til að sigla um og skoða. Ég held að það verði nú ekki vandamál þar sem hérna er fullt af fallegum stöðum. Myndirnar úr ferðinni eru á myndasíðunni.

Þyrlulæknar NZ

2006-10-11T23:33:00.000+13:00

Jæja, nú hafa íslensku þyrlulæknarnir komið sér vel fyrir í Nýsjálensku þyrlulæknasveitinni. Bergur er reyndar bara óbreyttur eins og er en á eftir að vinna sig upp metorðastigann. Hilmar er orðinn Senior Officer og Mikki er Officer því hann hefur verið aðeins styttra í þyrlusveitinni. Þetta er aðeins öðruvísi en heima. Ekki svona hallærislegir appelsínugulir búningar og hjálmar. Heldur smart júníform :) Þessi þyrla er reyndar til sölu. Er þetta ekki það sem íslenska Landhelgisgæslan er að leita að? Fáið hana örugglega á spott prís! Rússnesk gæði í gegn.
Ég tók fleiri flottar myndir af strákunum sem eru á myndasíðunni.

Ný klipping

2006-10-10T21:51:00.000+13:00

Heiðar hinn myndarlegi fór í klippingu um daginn. Það er svo sem ekki frásögu færandi nema vegna þess að það hefur ekki mátt klippa hann stutt í nokkur ár. Hann hefur alltaf verið að safna hári. Nú settist kappinn í stólinn og sagði hárgreiðslukonunni að taka allt af. Konan brosti vandræðalega og svo sá ég að augun á hennni fóru á fullt, hún var greinilga að leita að ábygum aðila að þessum strák :) Ég trúði ekki mínum eigin eyrum. Við héldum smá fund og Heiðar skoðaði myndir. Fann það sem hann og mamma hans voru sátt við án þess að allt hárið fyki af. Ákveðinn gaur :) Er hann ekki myndarlegur?

Gott kvöld!

2006-09-17T23:32:00.000+12:00

Við (litla fjölskyldan) fórum á yndislega tónleika í kvöld. Þetta voru tóleikar með Heru á folksongbar hérna í Christchurch. Stúlkan syngur eins og engill. Ég hef ekki séð Heiðar sitja jafn lengi kyrrann. Hann langaði mikið að fara á tónleikana og var mjög spenntur. Yfirleitt þegar þannig er þá er hann ekki lengi kyrr á sama stað en núna var hann grafkyrr. Við nutum tónleikanna vel og það var ekki frá því að smá gæsahúð hríslaðist um mig þegar hún söng þau lög sem við völdum fyrir borðhaldið í brúðkaupinu okkar. Hera tók líka eitt af mínum uppáhalds lögum Chocolate.

Viti menn!

2006-09-14T16:12:00.000+12:00

Undur og stórmerki gerast á hverjum degi. Hver hefði trúað þvíað við gætum afrekað það að kaupa bíl. En við höfum gert akkúrat það. Leitin var löng en við ákváðum að kaupa bíl í fyrradag og fengum hann afhentann í dag. Með öllu því aukadóti sem við sömdum um ss. króki og bandexpander á útvarpið. Útvörpin eru svo léleg í flestum bílum hérna . Ná bara 2 útvarpstöðvum, en með banexpander á útvarpinu þá er hægt að ná öllum þeim stöðvum sem í boði eru. Bíllinn er 5 dyra, óbreyttur, G módel (þá er hann flottari að innann), og já það er gott að keyra hann. Þeir sem vilja nánari tæknilegar upplýsingar eru vinsamlegast beðin að senda sínar fyrirspurnir á Berg. Það er lítið sem ég get sagt um bílinn á tæknilegum nótum :)
Það eru myndir af bílnum á myndasíðunni okkar. Vegna fjölda áskoranna bæti ég hérna við að bíltegundin er Toyota Surf 1996 módel ;)

Well done!

2006-09-10T13:04:00.000+12:00

Við reyndum að kaupa bíl á föstudaginn. Gerðum heiðarlega tilraun, alveg satt. Meira að segja fengum að reynsluaka einum. En hann var frekar svona leiðinlegur, eða frekar þreyttur. Á leiðinni heim komum við við hjá Harvey Norman þar sem var 3 daga útsala á rafmagnsvörum. Þar var sett af þvottavél og þurkara sem bara kallaði á okkur. Svo núna eru fötin okkar hrein og fín. Ég skil ekkert í þessum kiwium að nota toploaded þvottavélar. Þær bara eyða vatni og sulla þvottinum til og frá án þessa að þvo hann af eitthverju viti. Sölumaðurinn var ferlega fínn, var okkur alltaf sammála þegar við vorum að tala um toploded þvottavélar og svo þegar við vorum búin að borga þá sagði hann: Well done! (Vel gert). Við Bergur vorum að springa úr hlátri þegar við gengum út úr búðinni en svakalega stolt af kaupum okkar. Mér finnst við ættum að segja Kaupmannasamtökunum heima frá þessum frasa. Hver vill ekki ganga út úr verslun eftir hversu fáránleg kaup sem hafa verið gerð með þennann frasa glymjandi í hausnum og líða vel. Bílakaupin verða reynd aftur á morgun. Hvað verður keypt þá?

Queenstown

2006-09-06T23:56:00.000+12:00

Við áttum frábæra ferð til Queenstown! Við lögðum af stað á föstudeginum þar sem við vorum 5-6 tíma á leiðinni til Queenstown. Við völdum að fara í gegnum fjöllin, þvílíkt landslag. Nýja Sjáland er svakalega fallegt land. Komum til Queenstown um kvöldmatarleytið, sóttum lykklana að íbúðinni sem við gistum í og þar var spurt um teygjustökkið sem átti að fara fram daginn eftir. Veðuspáin var ekkert svakalega góð en það rættist heldur betur úr veðrinu. Smá rigning á laugardeginum en svo sólskin eftir það.
Það er svo margt skemmtilegt hægt að gera þarna að erfitt var að velja. Bergur og Mikki fóru í teygjustökk af einum hæsta stökkpalli í heimi. Nevis highwire Bungy 134 metrar, hvorki meira né minna. Myndir af þessu öllu saman eru á myndasíðunni okkar. Þeir eru miklar hetjur! Sem betur fer stukku þeir snemma um morguninn því vindurinn jókst rétt eftir að allri voru búnir að stökkva. Það er sem sagt ekki hægt að stökkva þarna ef það er mikill vindur.
Því næst var farið í vínsmökkun á vínekru sem er rétt hjá Kawarau brúnni þar sem teygjustökkið allt byrjaði. Mjög gaman að smakka mismunandi tegundir af vínum. Við létum okkur nægja að smakka rauðvínin allt fra ungra og léttra til gamallra og þungra.
Í eftirmiðdaginn fórum við í Jetboat, svakalega gaman. Fórum upp og niður ánna á um 80 km hraða, snerumst i hringi og skvettum út um allt. Víííí, meira gaman! Okkur langaði öllum að fara aftur! Um kvöldið var spilað spennandi Jenga spil.
Á sunnudeginum fórum við á skíði á Coronet Peak. Núna er vor hérna, svo veðrið var hlýtt og gott. Það er ekki mikill snjór eftir en samt nægur til að skíða. Heiðar er farinn að halda vel í við pabba sinn, Bergur missti stundum sjónar af honum. Meira hvað krakkanum fer hratt fram á skíðunum það er hægt að sjá framför í hverri ferð. Okkur langaði að skoða Cardrona sem er annað skíðasvæði hjá Queenstown, gerðum það og sáum fullt af Paraglideum á leiðinni. Þetta var eins og loftorusta! Mjög flott að sjá.
Mánudagsmorgun var keyrt heim strandleiðina, mæli frekar með fjallaleiðinni, hún er fallegri þó hún sé seinfarnari.
Við förum alveg örugglega aftur til Queenstown næsta vetur. Þetta er skemmtilegur bær, minnir mann svolítið á Chamonix í Frakklandi.

Hvar er Guðni Ágústsson núna!!!

2006-08-29T21:06:00.000+12:00

Skipið sem átti að koma til Nýja Sjálands í byrjun ágúst kom 21 ágúst til Auckland. Skipafélagið skrifaði okkur flott emeil sem sagði mér hvað ég þurfti að gera til að fá dótið. Nr 1 Landbúnaðarráðuneytið, Nr 2 Tollurinn og svo Nr 3 Skipafélagið, borga og brosa. En þegar ég kom á stað Nr 3 til að borga, eftir all langan tíma á hinum tveimur stöðunum var mér sagt að Landbúnaðarráðuneytið í Auckland hefði dótið okkar enþá og það kemur ekki til Christchurch fyrr en eftir viku. Ég var við það að snappa, þetta er orðinn ansi langur tími sem mér finnst ég hafa verið dregin á asnaeyrunum. Svo er það besta við þetta allt saman að enginn veit nákvæmlega hvar dótið er staðsett. Gæti verið í Auckland en kannski á leiðinni til Christchurch. Kannski vinnur ósýnilegi maðurinn hjá þessum fyrirtækjum. Ég var svo barnalega að trúa emailinu frá skipafélaginu og pantaði gistingu í skíðabænum Queenstown. En nú eru engin skíði. En við ætlum samt til Queenstown og skemmta okkur konunglega. Ef ég verð enþá reið úr í skipafyrirtækið og öll þessi fyrirtæki þegar ég kem þangað þá hendi ég mér bara fram af hæstu brúnni. Teygjustökk!! :)

Allt að koma :)

2006-08-24T21:50:00.000+12:00

Sem betur fer er öllum að batna. Heiðar er farin í skólann, ég er að komast yfir mína flensu. það er bara vonandi að Bergur leggist ekki líka. Heiðar fór með skólanum á Cultural Festival sem var í City Town Hall. Þar var margt skemmtilegt að sjá Maorar með dansa, Skotar með sekkjapípur og dansa, írar með dansa. Vildi að ég hefði getað farið líka að sjá alla þessa dansa :) Honum fundust sekkjapípurnar og írskudansarnir skemmtilegastir. Hann spurði mig hvort það væri nú ekki smá skoti eða íri í honum svo hann gæti farið og lært að spila á sekkjapípu og dansa írskadansa. Ég veit ekki til þess að einhver svoleiðs blanda sé í ættinni en hver veit. Mér líst vel á að hann læri dansana en ég veit ekki með sekkjapípuna ;) Kannski allt í lagi þar sem við erum með bílskúr. Við fórum að skoða jeppa í dag. Ég hef nú ekki vitað til þess að Bergur væri vandræðilega hávaxinn. Hann er jú hár og spengilegur en hann bara passar ekki í Toyota Surf með sóllúgu. Hann rekur alltaf höfuðið upp í þakið :) Svo nú erum við að leita að bíl án sóllúgu.

Allt að batna!

2006-08-19T12:13:00.000+12:00

Heiðar er er allur að hressast, farinn að tala en enþá smá hás. Finnst verst að geta ekki gargað eins og Nazgul. Það er víst mikilvægt hljóð hjá Lord of the rings fan :) Hann er þó enþá með hita en allur aið koma til. Við Bergur erum enþá að leita að farartæki, nú erum við hætt við að kaupa bensínknúið heldur viljum við kaupa dísel. Það er gamlakerfið hérna með díselinn þe þetta er ekki komið inn í verðið á olíunni per lítra. Við munum borga vissann kílómetra fjölda fyrir fram. Vonandi verðum við komin á bíl fyrir 26 ágúst og getum farið að ferðast meira um eyjunna. Stelpan sem lánaði okkur bílinn sinn kemur heim 26. Það er algjört must að komast til Queenstown og fara í ferð sem er á marga staði þar sem Lord of the Rings var tekið upp, Heiðar er mjög spenntur fyrir því jú og foreldrar hans líka ;) Tala nú ekki um að komast á skíði þangað.

Flensutími!

2006-08-17T09:24:00.000+12:00

Jæja en þá er vetur! Flensutíminn í hámarki! Heiðar liggur marflatur með hita, höfuðverk og hálsbólgu. Kennarinn hans í listaskólanum er búinn að vera veikur í tvær vikur og krakkarnir í bekknum hans hafa verið að leggjast í flensu hver af öðru. Engin furða að stráksi leggist. Hann hefur þó verið að taka íslenskt lýsi á hverjum morgni, Heilsutvennu. Svo ekki er hægt að skamma mig fyrir að gefa barninu ekki lýsi ;) En lýsið dugar skammt þegar ég má ekki klæða strákinn í almennileg föt í skólann. Ég fer út að skafa bílinn á morgnanna og Heiðar skottast á eftir mér í stuttbuxum. Mitt markmið í dag er að koma eins miklum vökva í hann og ég get. Svo fær hann eins og hann vill af snakki til að binda vatnið í líkamanum. Læt ykkur vita hvernig gengur.
(Vetrarmyndin er frá Lake Colridge)

Fyrstu brúðargjafirnar í NZ :)

2006-08-16T01:27:00.000+12:00

Við erum að komast inn í "rétta" rútínu, skóli og vinna. Erum að reyna að koma okkur betur fyrir. Keyptum sófa um daginn, fengum hann á flottum díl. Drauma sófinn okkar. Kósí og hlýr! Þetta var brúðargjöf numero uno. Svo fórum við í dag og keyptum okkur gott hnífasett, Global hnífa. Við höfum verið með "swiss pocket knife" í 2 mánuði. Ég skal sko segja ykkur það að skera lambalæri með honum er engin smá vinna. Frumraun okkar Bergs í kjötsúpugerð var í kvöld og að saxa allt í súpuna var æði, eða svo fannst Bergi :) Hann saxaði allt með bros á vör :D Nýtt húsráð: Til að fá húsbóndann meira inn í eldhúsið til að hjálpa við eldamennskuna, kaupa nýja flotta hnífa ;) Heiðar okkar er að plumma sig vel í skólanum. Fékk verðlauna plagg fyrir góða byrjun á önninni og mikinn áhuga á námsefninu. Skoraði mark í fótboltanum í skólanum. Já strákurinn er seigur!

Mt Hutt - skíðadagur! :)

2006-07-22T19:09:00.000+12:00

Við áttum frábærann dag í dag. Fórum á skíði á skíðasvæði sem er um 2 tíma akstur frá Cristchurch. Vöknuðum kl 7, pökkuðum og lögðum af stað á met tíma (fyrir okkur). Fyrir neðan skíðasvæðið þurftum við að setja á keðjur. Þeir sem eru ekki á 4x4 geta komið með sínar eigin keðjur eða leigt þær. Sniðugt! En samt ekki svo sniðugt því ef það hafa farið margir bílar sem hafa sömu dekkjastærð og þú þá bara so sorry þú kemst ekki upp á skíðasvæðið! Við komust upp á neðrabílastæðið því það efra var orðið fullt. Svo var tekin lítil rúta upp á skíðasvæðið. Við Bergur komumst að því að það er dálítið skíðasnobb í okkur. Þarna var fullt af skíðaskóm, allir af sömu tegund, vel slitnir og lélegir. Hvar er brettið með skíðunum okkar!! :) Þegar við vorum að fá skíðin þá sagði afgreiðslustrákurinn að við gætum "upgradeað" skíðin. Þannig að við fórum í brekkuna í hræðilega lélegum skóm, flottum skíðum og skemmtum okkur konunglega. Heiðari gekk vel að skíða og bætti sig í hverri ferð. Stíga, stinga og stemma er að virka. :) Nú er bara að drífa sig í að skoða restina að skíðasvæðunum í kringum Cristchurch.

Netsamband!!

2006-07-20T00:55:00.000+12:00

Við erum loksins komin með símalínu og netsamband. Þvílíkur munur að geta haft samband við umheiminn :) Í gær var verslaður skólabúningur á strákinn, fyrsta skipti sem ég kaupi peysu af stærð 14 ára, gvöð hvað hann stækkar. Heiðar er semsagt að byrja í skólanum á morgun. Hann er spenntur að hitta krakka á sínum aldri en einnig dálítið kvíðinn að fara í nýjann skóla. En hann er nú klár strákur og ég veit að hann mun plumma sig vel. Hérna er mynd af honum í skólabúningnum.
Hann þarf að vera í stuttbuxum þó það sé skítakuldi á morgnanna, þetta kalla Kiwiarnir vetrarstuttbuxur. Þær eru úr ull og eru fóðraðar sem er nú bót í máli en hver gengur um í stuttbuxum á veturnar! En hann má veta í þykkri flíspeysu yfir sem er nú skárra en ekkert. En ég hef nú ekki heyrt Heiðar kvarta um kulda, hraustur íslenskurstrákur!!

Snjóstormur!

2006-06-13T00:24:00.000+12:00

Í dag var snjóstormur á Ný Sjálenska vísu. Rafmagnið fór af í Wellington, hér í Christchurch lág netsamband niðri ásamt öllum almenningssamgöngum. Sækja þurfti börn í leikskólana og svo framvegis. Í rauninni var þetta bara frekar mikil slydda og bara leiðindaveður, hundslappadrífa. Við Heiðar fórum samt í göngutúr í garðinum, urðum rennandi blaut og köld. Annars er allt fínt að frétta af okkur. Bergur er búinn í prófinu. Nú er bara að bíða niðurstöðunnar. Heiðar er byrjaður í listaskóla, mætir einu sinni í viku og málar frá sér allt vit :) Hann er svaka duglegur. Hann fékk svo góða umsögn frá kennurunum eftir fyrsta tímann að ég var að rifna úr stolti. Á morgun erum við að flytja niður í bæ. Fengum fína íbúð í sama húsi og Hilmar og Svava búa á Cashel st. Það er reyndar ekki gott hitakerfi en húsið er vel byggt svo það mun handa þeim hita inni sem við setjum á ofnana. Rétt hjá er YMCA með líkamsræktar og leikfimisal. Þar er kennt spinning,pallar, Pilates og Karate. Reyndar ekki sami stíll og Heiðar hefur verið að læra heima en hann langar til að prófa . Stíllinn er Goju Kai, það verður spennandi að sjá hann. Svo eru ýmist ævintýranámskeið í boði fyrir Heiðar þegar skólafríin hefjast, þe í byrjun júlí. Við fengum sængurnar okkar á föstudaginn í síðustu vikur, þvílík himnasæla að sofa með dúnsængur. Allt annað líf!!

Hetjur dagsins!!

2006-06-04T21:44:00.000+12:00

Í dag var Maraþondagurinn mikli. Við Mikki fórum snemma í morgun að passa ungana þeirra Hilmars og Svövu. Það var nú ekki erfitt þar sem þetta eru fyrirmyndar ungar :) Árni Kristinn sefur yfirleitt eftir klukkunni og prinsessan Birna Líf syngjandi kát. Eins og fyrr sagði þá komum við Mikki til þeirra um 0900 og hlaupið átti að byrja kl 0930. Þau voru vægast sagt pínulítið stressuð, ég hefði nú ekki staðið í lappirnar af stressi ef ég hefði ætlað að hlaupa. Svo lögðu þau af stað með gelorkupakkningar í öllum litlum vösum sem hægt er að finna á hlaupagalla. Við krakkarnir fórum strax í það að mála íslenska fánann og hvattningar skilti til að hafa við marklínuna. Einum og hálfum tíma síðar stóðum við Birna Líf og hvöttum þau áfram yfir marklínuna. Þarna var staddur fréttaljósmyndari sem myndaði Birnu Líf með Íslenskafánann, hver veit nema prinsessan verði í blaðinu á morgun. Það voru flottar hetjur sem löbbuðu með okkur heim, kaldar, blautar en að ég held mjög stoltar. Í eftirmiðdaginn fórum við Heiðar í Riccaton Mall og byrjuðum fyrsta stig hlaupaæfingar okkar. Við sem sagt keyptum okkur hlaupaskó og byrjar ballið á morgun. Heiðar ætlar að verða þjálfari mömmu sinnar. Hann hleypur örugglega 10 km á meðan ég hleyp 5 km þar sem hann er alltaf að hlaupa út um allt og svo til baka til mín :) Bergur var að vinna í dag og frekar þreyttur þegar við sóttum hann í vinnuna. Heiðar og Mikki eiga sitt stóra kvöld saman í dag, bíóferð á X-Men 3 svo við hjónakornin sitjum við arineldinn og höfum það kósý, þe þegar ég er búin að blogga ;D

Áfram íslendingar :)

2006-06-03T20:36:00.000+12:00

Nú erum við að renna inn í háveturinn. Það var frekar kalt í dag og þá er rétt hægt að ímynda sér hve kalt er inni í strandfjallakofanum hjá Mikka :) Ég fékk loksins að fara ein með stelpunum (Svövu og Ásdísi) í Riccaton Mall og skemmti mér konunglega. Þar mátaði ég hlaupaskó sem ég er að spá í að fjárfesta í þar sem mínir koma ekki fyrr en eftir 2 mánuði með skipinu. Ég er nefnilega orðin frekar stórhuga. Er alvarlega að íhuga að taka þátt í 3 manna keppni með Svövu og Ásdísi þar sem er bæði hlaupið og hjólað. Bergur var að vinna í dag og er einnig að vinna á morgun en svo hefur hann frítíma í vikunni til að lesa meira, dugnaðurforkur:) Heiðar var hjá Hilmari og Brinu Líf. Þau fóru saman í Hagley Park þar sem þau gáfu öndunum og silgdu um í kanó, mjög skemmtilegt hjá þeim. Á morgun er á dagskrá hjá okkur Heiðari að vera andlegur stuðningur við Mikka sem hefur verið beðin um að passa hjá Hilmari og Svövu hann littla kút Árna Kristinn og prinsessuna sjálfa Birnu Líf. Þau hjónakornin og Ásdís ætla að taka þátt í 1/2 maraþoni hérna í Christchurch, þau massa þetta íslensku víkingarnir. Við Mikki bíðum með krakkana við marklínuna með íslenskufánana og lúðra jú og kannski vatnssopa :) Mér finnast þau svo dugleg ! Í kvöld verður bíókvöld í tölvunni með poppi og nammi og tilheyrandi. Heiðari langar til að horfa á X-Men 1+2 svo hann geti farið með Mikka á X-Men 3 í bíóhúsi. Mikil tilhlökkun í gangi! Svo nú er ekki til setunar boðið verðum að byrja á þessu svo hægt sé að koma stráknum í rúmið á skikkanlegum tíma :)

Vinarlegt fólk

2006-05-31T21:45:00.000+12:00

Ég var spurð að því í dag hvað mér líkaði best eftir þessa stuttu dvöl okkar hérna í Christchurch. Ég þurfti ekki að hugsa mig lengi um og sagði að það væri fólkið sem ég hef hitt hingað til, allt vinarlegt fólk. Þér er boðinn góður dagur með bros á vör hvar sem þú kemur, hvort sem það er fólk sem þú hittir á göngu úti á götu eða í litlu matvörubúðinni. Það er lítið sem ekkert stress. Umferðin gengur þó að hraðatakmörkin séu 50 km innanbæjar. Allir komast á þann stað sem þeir ætla á, við íslendingarnir þurfum bara að skipulegja okkur betur til að vera á réttum tíma. :D Í dag fengum við bíl til afnota í 3 mánuði. Einn læknir sem vinnur með Bergi vantaði einhvern til að passa bílinn sinn á meðan hún væri á ferðalagi. Við auðvitað þáðum það, þetta er Toyota Corona og er keyrð 352 000. Ég hef aldrei séð svona háa tölu á km-mæli :) Þetta er gamall bíll en í góðu ásigkomulagi. Svo við Heiðar gripum tækifærið að sporta okkur á nýja bílnum, fórum í bæinn og keyptum málningu og blöð. Portrait af Bergi með Maóra tattoo á andlitinu er komin upp á vegg :)

Sólskin!

2006-05-27T22:19:00.000+12:00

Vá hvað það er mikill munur þegar sólin skín. Það verðu hlýtt í húsunum! Allavega í strandfjallakofanum hans Mikka :) Í dag var fallegt veður. Við Heiðar byrjuðum á því að fara til Sövu og Hilmars, Bergur fór heima að lesa. Síðan var farið í göngutúr þar sem leiðsögumennirnir voru Svava og Ásdís systir hennar. Við skoðuðum markaðinn þar sem fullt af handverki var til sölu ásamt kremum. Já og svo var spákona, tónlistarkona sem spilaði á saxafón og fleiri götulistamenn. Einhenti maðurinn með hundinn sinn var flottur. Hundurinn Pollý gat dansað, sungið og rennt sér á hjólabretti. Heiðar var heillaður af saxafón leik konunnar en fannst hún ekki fá næga athygli þegar tveir sprelligosar byrjuðu að jugla keilum og vera með ferlega sniðuga skemmtun. Í eftirmiðdaginn fórum við Heiðar í Sundlaug þar sem voru 5 rennibrautir og í lauginni var öldugangur, sjóræningjaskip og margt fleira skemmtilegt. Nú er verið að púsla við arineld og blogga á tölvunni :)